【親子好去處】Marvel夏日超級英雄 @香港迪士尼樂園

今個暑假 Marvel 殺入迪士尼樂園,兩個知道可以一日見哂咁多個超級英雄不知興奮,連早陣子的 Star Wars 及 Iron Man 我哋都係第一次玩,今次真係去迪士尼去到盡!

 

為咗配合呢個《Marvel夏日超級英雄》,迪士尼推出咗個新遊戲「與神盾局對話」,只要用fb messager就可以開始玩

如果唔講真係以為有個職員在另一邊24小時同玩家對答,因為你每過一關佢都會回應你。

經過一關關嘅眼明手快測試,最後就會得到其中一個超級英雄嘅大頭相。因為兩個小朋友自己冇facebook的關係,所以就唯有用住我個名,等爸爸先做特工啦

估唔到佢哋兩個好興奮喎,知道每次玩都隨機有唔同英雄的大頭相,所以佢哋要Chok哂咁多個角色先甘心,誓要集郵集齊全套!

 

 

 

 

 

 

等咗兩個星期終於到咗呢日出發去做特工,起身食過M記早餐就帶住兩兄妹坐迪士尼線入樂園! 今次天氣有D熱,但係一D都唔影響佢哋入嚟玩既心情。今日我哋主要要完成的任務清單:

1⃣ 美國隊長英雄會面禮
2⃣ 參與「Marvel 危機次元任務」
3⃣「躍」見蜘蛛俠
4⃣ 鐵甲奇俠飛行之旅
5⃣ 製作專屬神盾局特工身份證
6⃣ 與「鐵甲奇俠」見面及互動

美國隊長就駐守在巿鎮會堂,我哋一入到嚟見人少少就即刻排隊(約15分鐘)

始終我哋都唔係金咭會員,所以嚟迪士尼次數一隻手都數得哂,冇咩經驗! 喺度排隊可以順便傾吓下一個任務要去邊

到我哋入去! 第一時間就係好舒服,因為終於有冷氣;第二時間先尖叫,因為媽咪話美國隊長好靚仔呀(其實戴咗頭盔又點睇得清楚呢?)
我哋一入嚟太心急,所以唔記得咗要去做番張特工證,就急急腳去咗「美國隊長英雄會面禮」(不過唔緊要,隨時都可以做番張證,同埋搵職員幫我貼番張貼紙)

喺頭先美國隊長所在的巿鎮會堂,就有個攝影師隨時侯命幫特工拍照,影完張相之後先過番去動畫藝術廊旁邊的照片店內辦理特工證件

神盾局特工身份證($58)已經完成,兩個小特工已經準備好啦! 我哋真正出發去完成所有任務啦
(+$40換取超級英雄證件套)

去到 Stark EXPO,但係太熱入去精品店嘆吓冷氣先!

佢哋兩個開心到仲拎起周圍D嘢戴上頭,呢個迷你變型俠醫真係幾得意喎

呢兩個真係超級英雄嗎?定係 HipHop 友… Man!

我哋呢班吔吔嗚特工,完成第一個任務之後就走咗去玩 Star Wars,依家終於歸隊去進行第二個任務啦 — 與「鐵甲奇俠」會面(唔係下底呢個~)

 

而係到 Expo Shop 隔離的「鐵甲奇俠裝備展」,今次就多咗少少人排隊(大約20分鐘)
好開心呀,終於俾我哋見到 Iron Man 啦,特別妹妹開心到好似見到自己男朋友咁!(不過呢個 Iron Man 好似有D矮喎…哈~)

 

完成任務就梗係要拎番張貼紙(其實張貼紙隨便問職員都會俾你^.^)

然後我哋直入「鐵甲奇俠飛行之旅」,佢哋成日喺電視裡面見到廣告個情景,今日終於嚟到現場啦!

呢D就叫做未出發先興奮,淨係邊行邊睇兩邊的機械展覽已經「嘩嘩聲!」(失禮)

我邊影邊望住呢個 Iron Man 諗緊唔知會唔會係真人無端端彈出嚟…(睇嚟我諗得太多)

如果拎住呢個喼番工都真係幾型

嘩…唔講仲以為自己去咗消防展,哈~~

戴上3D眼鏡,我哋去同 Iron Man 一齊打走壞人Lu !! 感覺超真實,芊芊睇完即刻話想睇多次,不過我哋真係好肚餓,所以就去隔離「火箭餐廳」食D嘢先

一場嚟到點可以唔叫番個主題套餐「英雄漢堡套餐」($109)

 

仲叫咗個兒童餐($82),有雞扒包、粟米,同礦泉水一支(不過我加錢轉咗橙汁)

 

小朋友見到有 Iron Man 喺個飽度就已經超開心,食都食得大啖D!

 

當我哋正要去 Adventure Land 向 Marvel 總部進發,俾我見到有超級英雄爆谷,即刻買番杯($38),聽人哋話迪士尼爆谷好好味本來都唔信,但係原來真係好掂,就算隔咗一晚第朝食都仲係脆(不過買街檔的會安全D)

 

然後又番到小鎮大街的 Bakery 買咗杯「超級英雄凍朱古力」

 

芊芊淨得拎住支 Spiderman 朱古力就已經開心到唔記得杯凍朱! 哥哥就嚟飲哂啦
Marvel 總部就喺「灰熊山谷」隔離(即前身冰雪奇緣場館)

去到 『「躍」見蜘蛛俠』(排隊大約5分鐘),入到去見到有個 Spiderman 跪咗喺度,睇睇吓原來係真人架! 不過佢講廣東話咁攪笑既?

仲揀咗佢哋兩個出去示範噴射蜘蛛網手勢,哈哈~~

 

 

又完成一個任務,除咗向職員攞貼紙之外,我哋喺 Marvel 總部行個圈睇吓有D咩買

 

離開後外面有兩個打咭位,一個係雷神個大鐵鎚!
仲有一個係美國隊長個大盾牌

呀芊…呢個盾牌唔駛扮拎起架,同頭先個鐵鎚唔同架!

已經完成咗3個任務,最後一個就係「 MARVEL 危機次元任務」,其實就同 『「躍」見蜘蛛俠』同一個地方! 所以出番嚟再排隔離條隊就可以(約20分鐘)

 

睇呢幾張相,好明顯係排隊冇嘢做…

 

 

 

成個「 MARVEL 危機次元任務」最深刻就係職員一直帶我哋向前行同埋大叫「GO! GO! GO! 嗱嗱聲!」^.^

話說今次任務係要幫博士搵番三粒失去的寶石

 

警報响起啦! 大家快D離開呢度,繼續向前進發搵寶石!

 

下一幕喺度睇下黑寡婦同鷹眼救我哋脫離危險

 

然後再聽奇異博士的指示再到下一幕

 

終於見到 Brad Pitt ….呀唔係, 係雷神先啱

 

哥哥好勇敢走上前幫忙解開機關攞寶石

再到一實驗室見到 Guidance of the Galaxy Star-Lord

 

最後將收集到的寶石放番入去機關內完成任務!

奇異博士又走出嚟啦! (好似D高層等班細既攪掂哂D X先最後走出嚟領工咁…哈~~~~)

 

 

出番嚟又係 Marvel 總部,拎埋最後一張貼紙,集齊全套! 可以8折優惠價買到限量版 Marvel 漫畫一本

 

場外仲有彩繪服務

 

 

哥哥邊行邊睇,因住呀…..!

今日超額完成各項任務,離開前再玩玩佢哋兩個最鍾意的遊戲…巴斯光年、小小世界、小熊維尼、魔法書房等

 

除咗Marvel夏日超級英雄,可以去片睇睇其他行程
http://bit.ly/2uk78uU
Photo by CANON 5D Mark IV, Len | EF 24-70mm f/2.8L USM
想跟我去體驗其他活動,快D報名親子團,同埋留意專頁公佈詳情啦!
呀劍評分: 10分
呀劍評語: 總結全日行程真係超開心,因為本身去到樂園已經超開心外,仲可以見到咁多超級英雄,打咭之餘又可以做小特工完成任務
《Marvel夏日超級英雄》
今個夏天,正邪交鋒!一眾Marvel超級英雄首次雲集香港迪士尼樂園,全力對抗邪惡勢力海德勒大舉入侵!充滿正義感及勇氣十足的你,趕快與你最擁戴的超級英雄並肩參與這場非凡任務!立即前往香港迪士尼樂園,與一眾超級英雄奮勇抗敵,親歷這場觸目之爭!

1⃣ 美國隊長英雄會面禮
2⃣ 參與「Marvel 危機次元任務」
3⃣「躍」見蜘蛛俠
4⃣ 鐵甲奇俠飛行之旅
5⃣ 製作專屬神盾局特工身份證
6⃣ 與「鐵甲奇俠」見面及互動

(以上資料更新至文章當日)