【親子好去處】西園農莊

自從上次復活節到「西園」體驗蒙古包及印第安營,一直都好希望可以快D安排到再嚟玩多次。等咗半年臨聖誕前夕,我哋終於又番嚟喇,今次除咗多咗好多全新活動,我哋仲首次感受觀星圓拱屋營區。

重覆嘅嘢就唔多講,大家可以番去爬舊文 http://bit.ly/2jO0Ssh
就可以知道點去同要留意咩!去到長洲碼頭後記住行過隔離小碼頭乘搭「華勝街渡」
同半年前天氣好大差別,今年提早入冬,撞正呢兩日寒流襲港,所以都著到成隻糉咁
不過下晝仲有太陽就特別溫暖,吹住海風又特別涼爽,真係出發先興奮

 

坐這個街渡都已經係小朋友第一個節目,兩個行到船頭,一D都唔驚跌落去,仲伸到個頭鬼死咁出睇浪
大哥!你唔驚我驚囉,我唔想跳落海救你…
最後都俾媽咪叫坐番喺度安全D
話咁快5分幾鐘就到西灣碼頭,睇番舊文就知行少少路見到牌坊同士多,上個斜唔駛8分鐘就到「西園」大門口
去到西園門前,仲見到招牌已換過,更加有中國傳統美!
我哋今日黃昏先入營,所以快快手登記辦好手續,就即刻出發去玩第一個活動(已經事先預約好)

好熟悉嘅小路,再次嚟真係好似番咗鄉下咁!上次嚟見人哋喺度整「叫化雞」,今次我都預約咗呢個活動,等小朋友體驗一下(其實我自己都未試過)
職員哥哥已經幫我哋準備好火,今次真係要掉呀仔落火坑
因為佢哋第一個任務就係要搵樹枝乾柴去燒個火
邊掉樹枝嘅時侯,要小心D煙向自己吹過嚟

 

掉下掉下都將所有預備好嘅樹枝掉哂落去
大火就預備好,只欠隻肥雞!
呀芊八八卦卦走去打開個蓋,裝下究竟係咩嚟?
當然就係我哋要一陣燒嘅大肥雞啦!估唔到由洗雞呢個步驟開始,呀媽咪好驚見到雞頭,所以就派兩個燒雞專員去攪掂佢
又係時侯講道理,當佢哋洗緊雞,就乘機教佢哋咩係「成功需苦幹」,兩隻嘢白食白住咗咁耐,今日係時侯我兩老蹺埋對手等佢哋服侍
其實隻雞都事前清潔好內臟洗乾淨,只不過想小朋友都體驗一下
不過呀芊一於少理,當隻雞係公仔咁武,先用五香粉搽勻成隻雞
哥哥就負責用刀砌薑同蒜粒

 

呀芊一邊搽雞就一邊攪隻雞,喺度用手掹開隻雞眼,重覆個動作等隻雞好似眨緊眼咁,笑死我!
雞:「你咁大力鍊住我條頸,我抖唔到氣呀!」
隻雞生勾勾嗰陣又唔見佢咁大膽,人哋死咗先至喺度攪攪震,如果隻雞突然識郁識叫一定嚇死佢
哥哥好比心機繼續砌好哂所有蒜同薑

 

呀芊搽勻五香粉之後,就要落老抽幫隻雞上色啦
一家人喺大自然森林中開心煮雞食真係好Happy
「呀芊,你想點呀!」佢話要同隻雞 K I S S,睇嚟佢同隻雞產生咗感情
然後將哥哥先前預備好的薑片蒜粒,全部塞滿肥雞裡面
見佢哋塞得咁開心,我正喺度諗不如我得閒都買隻雞番去俾佢哋玩下,玩完拎去煮嚟食
一個擘開個X,一個不斷塞蒜頭同薑入去,分工合作 ^.^
然後用錫紙包3-4層

 

可以拎過去火坑整「叫化雞」啦,其實呢味菜仲有幾個名「乞兒雞」、「富貴雞」係江蘇名菜

 

 

大家其實都可以用荷葉包,不過就會難熟D,但係開出嚟嗰陣係超香!

職員仲教我哋呢味新菜,將個洋葱掘空,然後打隻蛋入去,再用竹籤固定放落去燒
唔知效果係點架呢?! 我一定要燒到溫泉蛋咁!
放哂落去燒之後,就要起碼等成個鐘之後先有得食,呢個時侯就帶齊行李去我哋第一次住嘅觀星營! ^>^ ~ ~ ~
其實西園仲有好多唔同類型嘅營區,大家可以爬舊文睇詳細介紹

 

 

公眾浴室連洗手間,全部都起乾淨 (頭先我哋就係喺呢度洗雞~)

有汽水同零食機,當然大家都可以客務中心直接買,仲多選擇!
好興奮今次可以住觀星圓拱屋,諗起夜晚可以喺屋裡面瞓低望住個星空就開心

圓拱屋裡面好闊敞呀,足夠兩個跑嚟跑去同跳床…T.T
透明膠幕兩邊有紗簾可以夜晚拉埋佢,唔驚俾人睇蝕哂! 外面有私家獨立厠所(設有風筒)同埋戶外餐桌及椅,洗盥用品拖鞋都齊備,房內提供4支礦泉水同埋一盞手提電燈

 

哥哥呀芊一入到嚟就幫圓拱屋改咗個名做「菠蘿飽屋」,個名又幾得意好聽喎

屋頂中央位置有個抽氣裝置
休息咗一陣間,我哋又開始另外一個活動「馬騮上樹」啦! 呢個活動係今年新加的,我入營前同佢哋兩個講,佢哋都好大膽話一定玩唔會驚,睇吓一陣又會點?!
你大喊之前俾你扮下大隻佬威一威先

 

佢哋兩個身後的樹頂走廊,上次媽咪玩完都話幾驚,再下一次到佢哋高D有機會嚟,佢哋就要接受呢個挑戰啦!
戴埋個頭盔就攪掂哂,可以出發去「巨人梯」嗰邊玩啦!

 

 

 

先聽聽教練講要注意安全嘅地方,究竟芊芊聽唔聽得明?
行到棵樹前面終於開始識驚啦
我依家知咩叫「年少無知」教練問邊個想玩先,居然呀芊第一個舉手(我諗佢只係驚死蝕底,人哋問邊個想先,一貫作風都係想爭做第一個)
最細呢隻馬騮開始啦! 開始爬嘅時侯冇人夠膽出聲,就連打氣都唔敢,因為怕佢會望番落嚟仲驚。
第一眼梢番落嚟居然唔驚喎! 呢個時侯都離地有1米高架啦
真係咁勢利? (你見我影相呢個角度,其實已經有兩米多高)
呀芊,爹哋以妳為榮呀! 你居然可以爬到咁高
不過就停喺呢度啦! 佢開始面容扭曲不斷擰頭,教練同我都鼓勵佢多一陣,但係佢都話唔得!
之後就慢慢咁落番嚟! 不過全場都拍手掌讚佢好叻,因為之後有個同佢差唔多大嘅男仔只係爬到佢嘅一半咋! 呀芊爬到呢個高度係整段嘅一半,大約都有4米高,好叻豬囉

 

話咁快就到哥哥爬上去,一貫作風好心急咁已經上到頭先呀芊嘅高度(我都未嚟得切影相…)
距離搖鈴只係米半多…
順利搖響個鈴啦!! (咁快爬到上去咪好快玩完? 教練好好人的會問有冇小朋友想玩多次)
要好好捕捉呢一刻,因為哥哥又一次挑戰成功! 希望可以記錄低佢哋唔同時段的成長歷程
小朋友在這自由自在的環境下跑跑跳跳真係好享受!
西園的地方真的很大,相信玩伏匿匿可以匿埋成日都得

 

好快就天都黑哂,我哋番去睇吓「叫化雞」同「洋葱蛋」完成未!

 

洋葱皮外就梗係燶哂啦,但係掀開個蓋,見到隻蛋真係溫泉蛋,好吸引呀好正呀!!!
食入口嘅溫泉蛋好Creamy,仲有陣陣洋葱香甜,不過下次可以放番少少鹽吊味!
我哋嘅「乞兒雞」出爐啦,真係成舊石頭咁!究竟成唔成功呢?
個火之後仲可以用嚟燒下麵包燒下綿花糖咁
哥哥拎住碟大雞上去食,妹妹幫手照住條路,點知…
點解呀芊突然大叫,可能隻雞太香,有隻狗從後跟住走上嚟,嚇得呀芊急急腳走,笑死了
大肥雞上枱了
打開錫紙,一陣超雞香飄出嚟,當然有部份燒燶哂,但係裡面D肉都滑一滑,就咁搵手撕開都冇問題
雖然有一邊燶,但係另一邊就冇事,連埋雞皮一齊食,兩個食過唔停口
呢對港孩不停鬥快爭食多D,驚死蝕底
兩個食到佢哋個衰樣,咁我哋兩個點呀…咪「損」骨囉

 

用荷葉包嘅又如何呢?雖然有荷葉香,但係好似未太熟,時間要耐D

 

兩個食完仲唔夠喉,要離營到外面士多食唧唧冰

番入營再嚟個宵夜節目,就係拎住電筒去探險,其實天氣又冬又乾,昆蟲大人都番哂去冬眠
我就影到張靚相自我滿足,原來香港都可以睇到咁多星星(請抹一抹個Mon先再睇)
上次嚟西園正係入夏時,仲記得玩弓防箭時身水身汗,今次秋冬到西園,著起全副武裝,陣地換咗去魔鬼森林,氣氛有別於上一次,更加認真好玩,好緊要係唔駛流汗好舒服!

重覆嘅嘢就唔多講,大家可以番去爬舊文,睇番我哋第一次西園之行 http://bit.ly/2jO0Ssh
仲有可以去睇番上回提要,可以去呢度睇 http://bit.ly/2Bru3LI
 
天氣凍,一家四口瞓喺暖笠笠被舖裡面真係唔捨得起身,但係又要快快去食個早餐,再開始今朝嘅兩個活動
一大清早起咗身,同哥哥出去走走,呀芊同媽咪女仔人家係要攪耐D。
西園內的魚菜共生系統非常大
有機會都叫負責人帶我哋導賞一下
又靚又環保!如果可以俾我捉番條魚嚟燒就好

這邊的工地似乎正施工,但都見9成面貌,睇字 「Experimental Farm」 即係實驗農場啦
應該又一個新活動可以俾一家大細喺度享受田園種植樂趣,問過開緊工的叔叔,後面個架係用嚟種瓜。呢個鐵水喉稻草人,我諗將來又會成為一個打咭景點

到咗8:30嗱嗱聲跑去食早餐(Glamping營區已包括了早餐)
簡簡單單的早餐,呢個咁舒服嘅環境底下變得一D都唔簡單
一家人仲食得好開心,小朋友食食吓又跑出去玩,玩完又番嚟食過
食食吓見到一群羊跑出嚟食早餐,芊芊就嗌住我,要我陪佢一齊去餵羊
手執住幾棵葉就拎去餵,成群羊走埋去芊芊度嚇到佢閃開,又要餵又要驚…
非常大自然,小朋友唔駛隔住個圍欄去餵佢哋
芊芊特別對細小嘅羊照顧,見又大又老嘅羊,就唔餵佢哋…只餵白雪雪嘅小羊咩
芊:「我唔係俾你食架!唔好搶我條草呀!」
活動仲未開始,兩兄妹自找樂趣,設計遊戲自己玩
這種兩小無猜的感情真係好可愛!
去個厠所洗番乾淨對手,準備這朝早第一個活動啦「森林弓防箭」
兩小伙子駕輕就熟,因為上次都嚟玩過一次,不過就係玩「草地障礙弓防箭」,同今次「森林弓防箭」有少少唔同,今次喺「魔鬼森林」場地玩,更加刺激!
著好裝甲就睇姐姐示範一次點玩
未開始實戰之先,就梗係要試一試箭先啦
「魔鬼森林」就係印第安營隔離,拎住弓箭個樣就同後面背景好襯,差在塊面未畫花到好似紅蕃咁
3個帶埋頭罩之後真係似白兵多D ^>^
我覺得呢張同先前嗰張放埋一齊,好似「變身前」同「變身後」咁好攪笑
開戰啦!哥哥好快就走咗出嚟進攻
媽咪都上唔切箭,就嚟要俾哥哥射中
呀芊都出動,「森林弓防箭」個玩法係要一邊進攻,去到敵方陣地搶咗支旗,再跟手跑番去自己陣地就算贏,當然俾人射中就要番歸由頭嚟過
當大家係互相廝殺嘅時侯,呀芊經已唔知幾時搶咗支旗(仲除埋個頭盔)
Round2 開始!
兩個近排成日都喺度扮「鷹眼」射箭,呢個活動啱哂佢哋! 仲記得哥哥以前叫「鷹眼」做「雞眼」,真係笑死我!
戴住成副裝備玩完,真係要抖一抖,因為隔多一陣就進入我哋最後一個活動,就係親手DIY雞蛋仔!!!!! 活動喺公共燒烤場進行
話時話如果大家入嚟Camping可以付費租爐BBQ,可以睇番我上次嚟的文章,有多款燒烤包任君選擇
估唔到雞蛋仔成日食,今次可以自己親手整,真係超開心!

咪講笑,仲要係一人一炭爐燒!!!

起初以為又係職員預備好半完成材料我哋做,原來真係由零開始,落粉落糖落雲呢嗱精,真係可以話一手一腳自己攪掂
哥哥好俾心機整,呀芊就八八卦卦幫人哋
篩麵粉都要自己嚟!!
哥哥真係似模似樣成個大廚咁喎
兩兄妹合作整睇見都窩心! 幾時真係煮番餐三餸一湯先,我諗到呢一日我會喊囉
準備定炭爐啦!
燒紅個雞蛋仔模先
示範都冇,要靠自己從錯誤中體驗學習
呢D嘢梗係等媽咪嚟先! 用個掃油一層油喺個模度先
媽咪好小心咁將蛋漿倒入模,平時去買嗰陣睇人倒好似好易,原來一D都唔容易
原來夾實咗之後,雞蛋仔會澎脹,所以要好大力咁夾實個模
兩個見到就嚟有得食,就超開心
雖然唔可以做到好似「北角雞蛋仔」外脆內軟,但係第一次做的這個效果已經很滿足
自己親手做的特別好食
媽咪實在厲害,因為到第二底我整就爛哂! 第三底再俾番媽咪做,仲可以加朱古力味同芝麻味
嘆完雞蛋仔,發現尋晚玩咗咁耐,都未同我哋今次營地主角「觀星圓拱形屋」影相
哥哥同芊芊最開心就係離家出走,到外面大自然住番晚,其實我哋都係(如果唔駛帶咁多嘢的話)
呢個媽咪好有心思,提意帶埋聖誕帽入嚟影相,即刻好有聖誕氣氛
Photo by CANON 5D Mark IV, Len | EF 24-70mm f/2.8L USM
想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 今次第二次到西園玩,期待咗好耐!因為只係講個場真係無得輸,一嚟到已經內心平靜好舒服,加上今次可以做「叫化雞」同埋「雞蛋仔」真係好好玩,而且上次冇咩歷奇活動,今次可以玩「馬騮上樹」挑戰兩個細路膽量,真係好刺激好玩!
地點
香港長洲西灣西園

網址
www.saiyuen.com

開放時間
http://www.saiyuenfarm.com/index.php/information/sai-yuen-farm-openhour/

收費
http://www.saiyuenfarm.com/index.php/sai-yuen-farm-tickets/

Facebook
saiyuenfarm

電話
2981 1010

電郵
booking@saiyuen.com
(以上資料更新至文章當日)