【媽媽日誌】宜家生活只係圍住BB….

同好多媽媽一樣, 有左之後開始, 行街唔再係睇自己野…. 眼中只有BB野

八個月開始, 個肚大到個人好易攰, 平時放工, 通常仆返屋企攤….. 但呢幾星期, 我竟然放工都有幾日出左街。
原因就係, AEON同一田分別都有BB展呀~~~~~
三月頭既星期五, 放工衝左去左黃埔AEON, 幫細妹買左十盒芝士, 原價$25.9/包, BB展特價 + 會員折扣, $20.8/包

之後到買自己野~~ 返工時已睇定張可以平躺既餐椅 (返工緊係要抽時間做「重要」野ga la), 因為本身屋企係地台床, 所以就咁係隔離放多張一樣厚度既床肉, 就當係BB床。但都因為咁, 個廳冇位比BB訓, 行開行埋/有親朋好友黎到探B都唔方便。上網睇其他媽媽推薦呢款餐椅, 話如果要買, BB愈細個買既話就愈抵用, 因為到佢地識坐, 已經唔需要平躺既功能。

上網睇二千頭既價錢都接受到, 所以未出發已決定買呢張。點知, BB展特價 + 會員折扣 + 特別優惠(滿$2000減$200), 最後2千蚊都唔使!仲包送貨, 正呀喂~~~ 慳左個2百幾蚊, 即刻同老公過隔離食個晚餐先走人~~~

 

上星期六, 終於都送左黎la~~ 嗯, 我屋企太細, 放完張櫈, 得返條拿比人行。不過BB最大, 佢訓得舒服就得lu~~

行AEON, 有個終極目標, 就係CASA-V既大豆被。聖誕已經睇中左, 個時特價$189, 但諗住唔使咁早買, 到一月尾經過, 都仲特價緊。坐定粒六諗住AEON新年實有折既, 遲d先。點知…… 新年前去黃埔睇, 無晒貨。轉去太古睇….. YEAH, 有貨~~~~~~ 有特價……….但$429既?!!!!!!!!!!! 原價$5XX, 特價$429……. 買唔落手…. 又等…… 今次BB展, 黃埔仍然冇貨。最後最後去左九龍灣, YEAH!!! 有呀, $189呀, 仲要剩返一張呀~~~~ 即時攬實張被, 衝去比錢。最後買單唔使$170, 成晚都keep住講: 好開心呀, 咁都比我買到呀!好開心呀, 咁都比我買到呀!好開心呀, 咁都比我買到呀!好開心呀, 咁都比我買到呀!好開心呀, 咁都比我買到呀!

本身諗住D野都買得7788, 可以繼續我既「攤C假期」, 點知, 又到一田BB展。忽然耳邊響起一句:「唔買都黎睇下啦喂!」, 又真係去左睇。今次揀左荃灣一田,唔明點解大家都係BB展, 但一田明顯比AEON多人好多好多…… 仲要好多大肚媽媽一齊迫, 我驚比人撞到之餘, 更驚撞到人呀~~~~ 最後買左個AVENT既儲奶瓶就走lu~~ 一田AVENT做緊八折(AEON個時唔多覺眼佢有折)。

($108/10個裝)

除左買野, 仲有好多野都只係諗住BB。

例如:忽然有一日開始, 個肚好痕…… 夜晚更痕, 全身痕, 痕到訓唔到……… 第二日返工上網睇, 有可能係妊娠濕疹(都話返工要做「重要」野咯), 同我細妹交流下:佢識人第一胎個時, 媽媽又係全身痕, 但個B出世皮膚好靚;反而第二胎媽媽無事, 但BB出世有濕疹。

我第一個反應:真ga?! 咁都好D, 我痕好la, 唔好搞到個仔。

又例如:懷孕前好鍾意飲咖啡, 宜家已經8個幾月冇飲過。上星期有日同老公去左咖啡店, 諗住叫杯朱古力就無事, 點知飲左一啖, 有淡淡既咖啡味…… 老公都飲左啖, 都話有咖啡, 但好少好少, 應該唔驚。但我驚呀, 最後真係飲左幾啖就放棄……

又又例如:老公一直想買車, 而我一直用拖字訣。因為香港交通實在太方便, 基本上無論去邊都有車到。但新年個時, 入左新界拜年, 走個下全巴士滿座, 加上無人讓座既情況下, 企足40分鐘, 老公落巴士第一句就話: 「我一定要買車!」(ok, 終於比你搵到個好好既借口, 仲要係可以扮man既借口) 我平時連的士同uber都唔捨得搭ma….忽然話買車, 咁重皮…. 但我發現老公既口才進步左….. 佢不斷同我講, 有架車可以同BB去邊去邊, 想幾時去就幾時去, 又可以係車到餵奶、換片, 仲可以邊揸車邊播兒歌….. 嘩~~ 係wor~~ 好正呀~~~ 快d買快d買

以前未大肚, 會成日覺得d媽媽使唔使咁誇張呀, 有左都可以做自己既啫。但原來真係會不知不覺中變成咁……. 「終於發現比自己生命更重要既東西」(來自日劇「雙面醫生」), 宜家完全明白呢句說話既意思。

(btw, 「雙面醫生 / 產科醫鴻烏」堅好睇, 無論第一輯定第二輯,我老公都會一齊煲, 不過如果你係懷孕中媽媽的話, 真係要諗清楚先好睇。事關真係會喊到顛, 但又停唔到繼續煲架)