毛記上市 – 關我咩事?


利申:我冇抽毛記,因為覺得唔會抽中,慳返!

今日facebook被毛記上市消息洗版,我並唔係毛記粉絲,最深刻印象係睇過黎明同佢地拍的咖啡廣告,係咁多喇!

同埋知道個老細叫林日羲!

記得有一日當Timtam仔訓宴教,我睇睇下YouTube 化妝片,唔小心按錯左,跳出林日羲的訪問片,睇佢講野又幾攪笑,就繼續睇落去!

睇完就覺得,如果我係林日羲個阿媽,真係日日嘔幾兩血都攪唔掂!

原來林日羲讀中學時期,佢自稱有「病態反叛」,父母叫行東,一定行去西,總知一定要唱反調,就算阿媽叫佢飲碗湯,佢偏唔飲, 如果阿媽唔叫,佢就先會去飲!天氣冷得10度,臨出門返學阿媽叫佢著衫,佢就偏唔著,明明凍到流哂鼻水都唔著,佢話林媽媽日日都喊住問點解會生個咁嘅仔?

仲有,林日羲又專登唔交功課,記大過而轉校,最後去讀IVE, 又唔讀走去做商台,佢話林媽媽最後已經完全放棄佢!

林媽媽今日見到毛記上市,個仔由做廢青到今日做左幾億身家的上市主席,唔知有冇苦盡甘來的感覺?

我又唸,如果第時Timtam仔好似林日羲咁,我應該要點樣做?

我做人阿媽資歷尚淺,我都唔識點做!不過我覺得,將來的世界,一定不會同現在一樣,不應該只用學術成績來評定一個學生叻唔叻!

況且,係30年前,冇電腦冇iPhone , 我阿媽係以做工廠妹為榮,一間公司可以有上百個會計,現在一部電腦攪掂哂!

阿媽教我地,只要讀好書,就搵到份好工,就可以出人頭地!

林日羲話你知,呢個世代正翻天覆地在轉變!

如果我地用上一輩的教育方法去教我地的子女,讀到書當然好,讀唔到係咪就係廢青?

我相信每個小朋友都係獨一無二,都有佢自己的天賦!我地做父母,除左學術上的知識要教導之外,可以點樣幫仔女發掘及培養自己的天賦和興趣?

毛記上市,如果冇抽過,好似又唔太關我事!不過睇完呢篇文而你又有個仔的話,會唔會好似我咁唸下,宜家可以開始做d咩,為十年後阿仔的反叛期做定功課?

Facebook: Timtam仔的成長日誌