孕記記錄:終於到了30週的「中獎」過程

終於到了30週的「中獎」過程。

最近大台果套「bb來了」個個都話好睇,搞到我呢個平時唔睇電視既,都開個mytv煲番;入面神之馬壯知道李佳芯有左果下,一句「有無咁易中呀」令我諗番自己剛剛懷孕初期都講過同一句說話。

自己過左25歲女人的分水嶺、但又未到29+1、新婚、工作運不錯、有自己私人時間去學野、家庭經濟壓力唔大、得閒同朋友high tea行街、同老公不時去旅行呃下like! 日子好開心好容易過、真係自己夢寐以求既生活!

在2018年1月,我同老公去左台灣旅行,旅行期間突然唔知發咩神經,去買了一支驗孕棒….結果當下既反應同神之馬壯一樣「有無咁易中呀」!結果我在台灣用了兩支驗孕棒結果都係一樣….心情個種忐忑不安,真係諗番都覺得自己搞笑。

在酒店望住呢兩條線,真係連台灣綜藝節目都無心睇!

我番到香港再搵電子驗孕棒再試,結果都係一樣!大大個3+
其實我係有諗過唔要生bb,覺得生活好安逸,同老公好甜蜜自在既生活,真係唔想被打亂晒,而且自問自己都唔係特別叻既家庭主婦,對湊仔no idea,前路茫茫既感覺!

最後坦白同老公講既一刻,自己都忍唔住喊!佢一時反應唔黎,但我睇得出佢係開心多過擔心!相反,我係勁不安,覺得要養活bb已經唔再係世界級事情…係宇宙級level 打大佬既關卡!

最後等了幾個星期,老公同我去私家照,第一次見呢個上天突然送比我地既大禮。

只覺得生命好奇妙,呢個就係我個bb! 但真係考慮左好耐,而且真係用左一段時間先接受到自己當媽媽了!過程真係又喊又笑。女人可以為下一代願意放棄自己身材、樣子、生活方式,到今日我都想讚美一下自己!辛苦晒。

頭3個月,我個jackpot 仔對我真係幾好,基本上我無點嘔過!只係個胃頂住頂住,少許作嘔作悶!我既小辦法就係食辣薑片,萬試萬靈!果時我當包薑片係寶架!

之後係私家度做左T21,第一次為bb感到緊張忐忑,知道係仔仔,而且無特別問題,個心安樂晒,事後仲同老公去簡左第一份送比bb既禮物。

16weeks 4days見到阿仔係肚肚度彈下彈下,自己更加想努力為呢個仔做準備; 當時仲未好見肚肚,仲未感到胎動,但身體變化開始黎料,爆晒暗粒,同埋成日好累!但都同自己講都要支持住!頂硬上!

懷孕5個月,阿仔對我真係叫好好☺️☺️皮膚靚番晒,而且食得訓得。肚子已經藏不住,開始感到大肚婆既好,身邊所有人對你都特別有愛!但最緊張都係去照結構,擔心之餘又諗唔知阿仔咩樣呢、自己既營養有無好好比到阿仔呢等等問題!最後醫生一句:全部正常!簡直係沙漠中的甘露,把大肚媽媽的不安,完全分解!而且開始感到胎動,愈來愈愛上阿仔既胎動!

懷孕24周時的小jackpot !為了見你一面,媽咪每個月都好準時去產檢,每次都好期待!雖然目前為止,都不是每次看到bb 既可愛樣!但認真架!去私家產檢真係每次都好興奮,見到jackpot 係肚肚度健康,真係好開心!而且胎動愈黎愈多,每日都會摸摸肚肚,比歌仔佢聽,希望jackpot郁多d!但都希望佢第日出到黎比較易湊啦!阿媽好驚搞唔惦啊!

終於到了懷孕30 周,肚肚大左好多,隨後就係腰痛,訓唔好,腳抽筋,行路慢左好多!但都依舊好想作個孕記回憶、同老公去了拍孕照。

今天自己的心態180度轉變,終於明白咩叫為母則強,加入媽媽會,學湊仔知識,什至上網睇所有嬰兒用品成份,以前自己用護膚品都未話會上網查,讀書都無咁認真。雖然唔知自己呢個新手媽咪,會唔會可以合格過關,但我的確改變了很多,我希望兒子有一個快樂健康的童年,希望兒子感覺到我們的愛。

期待兩個月後見到你。各位新手媽咪,共勉之。