我真係好憎泵奶呀

曾幾何時,大食仔全埋身左一個月,個個月好開心架,一條餵奶巾走天下

可惜,快樂既日子過得好快,又係時候準備返工,早左兩星期轉奶樽比大食仔適應,而我亦正式加入泵奶既行列。
一開始,都ok架,我泵幾多,大食仔就食幾多。但好快,大食仔同佢個名一樣,已經唔夠佢食。。。我泵三次,先夠大食仔食兩餐,而佢一日五餐,即係我一日泵夠八次先岩岩好夠佢飲。。。。咁。。。我仲點儲奶,返工後比咩佢飲呀?!
上網睇左好多上奶方法,滴雞精、月子水、黑豆水、椰子水、魚湯、魚生、花生豬腳、黑芝麻。。。講得出既我都試過晒,但奶量完全冇多過。。。又試過埋身食完後再泵,但唔知係咪大食仔食得太好,佢食完,泵左半個鐘,仍然係一滴都冇。。。最慘係,冇多奶之餘,仲要塞奶。。。真係。。。你多奶塞,我都原諒你,你已經冇奶,仲塞乜鬼。
臨返工前一星期,先儲得30包奶,但又要開始隔疏啲泵奶時間,因為返工只可以lunch hour泵一次,要適應定。加上啲人話返工後奶量會急跌,都咪話唔驚。細妹教我試下power pumping。
http://nurse4baby.blogspot.hk/2017/07/power-pumping.html?m=1
叫我堅持每日做,就算冇多到奶,都可以keep住奶量。
試左兩日,冇多到奶,心急情況之下,每次泵奶前中後都狂飲1L水。飲到。。。有晚泵完奶,頭暈到企唔到。攤係床到,忽然覺得好無助。。。我已經咩方法都用齊,點解仲係唔夠個仔食,點解咁多媽媽都得,係我唔得。啲講座又話媽媽泵幾多,bb食幾多既?! 點解我唔係?又話唔夠奶,只要埋身就會多既?! 點解完全係兩回事?點解、點解呀??????
諗諗吓,就爆喊左出黎,又嚇親身邊個個。以為老婆平時反應慢啲啫,乜產後抑鬱都遲鈍過人,生完兩個月先黎?!
老公一句:唔夠咪補奶粉囉,你有幾多就比幾多,我地細個都係食奶粉,宜家咪又係咁。你咁唔開心,大食仔會feel到,咁佢都食得唔安樂啦。
之後,就開始補奶粉,又輕鬆左幾日。到正式返工,半夜、朝早同公司個三轉都冇問題。最大問題係夜晚七點既power pumping,要成粒鐘。。。準時放工返到屋企已經七點三,set埋野,差唔多七半,泵完都八半。。。
好多時係廳邊泵邊聽到大食仔係房同爸爸玩到keke聲、又有時大食仔係房喊到wah wah聲,真係好想掉低晒奶泵衝入房!!!! 但一諗到大食仔聽日餐飯,只可以死死地氣坐返係廳泵奶。。。

最大問題係。。。大食仔八點九要換片、食奶、刷牙,準備訓教。。。即係我放工返黎,只有15分鐘陪佢。。。究竟power pumping係咪真係有用架?哇,大佬,泵左成個鐘,都係得4安。。。我去陪大食仔唔好?!!!!!
但,都係keep住power pumping,因為好怕本來已經少既奶量會更少。但朝早個一轉,決定唔泵,埋身再補儲落既人奶。放假就更加少泵,keep住埋身再補奶既方式。呢個方法,儲唔到奶架,但可以令自己開心啲,因為我真係好憎泵奶,埋身感覺太close太好。Touchwood, 返工後奶量同之前差不多,仍然夠大食仔食2-3餐人奶。
多謝大食仔乜都食,埋身、奶樽、雪奶、冰奶、奶粉都食到津津有味,令阿媽我可以咁放肆,想泵就泵,唔想泵就埋身; 有貨就人奶,冇貨就奶粉。
媽媽雖然好憎泵奶,好懷念一教訓天光既日子,但只要你一日食奶,媽媽都會繼續泵奶,飲多10ml就10ml啦!