【I Know that feel 荷爾蒙】論盡爆煲媽咪《Tully》8月30日獻映

生仔之後嘅媽媽究竟係咩一回事? 呢種由懷孕到new born帶嚟嘅苦與甜,男人從來無從得知女人嘅內心。最近有套可以將生仔之後嗰種「I Know that feel 荷爾蒙」感覺表達出嚟嘅電影,確實係不得了。
講緊嘅就係早幾個月已經喺美國上映嘅《Tully》(論盡爆煲媽咪) 終於嚟到香港,呢套由《Juno少女孕記》嘅編導班底製作,不過今次主角就唔再係未婚媽媽,而係金像影后查莉絲花朗(Charlize Theron),佢仲專登增肥35磅去飾演呢個頹媽角色! 主角Marlo雖然唔係新手媽媽,仲要本身已經有2個小朋友,細仔仲係有特殊照顧需要,電影開初已經盡顯佢生活有幾頹,加上有個好勤力返工同打機嘅老公,然後仲要迎接new born baby,真係一個打4個!

BB出咗世之後佢直頭迷失咗,喺呢個時候,就有一個年輕嘅夜班褓母Tully出現,一夜之間好似就解決晒所有問題咁,之後Marlo越嚟越搵到自己咁,個人都開心返,連兩公婆嘅關係都大躍進,真係咁簡單?



如果細心啲睇,故事情節中間會令人出現好多問號,要到差不多結尾,用一句對白就會揭開所有之前嘅答案! 其實懷孕同產後經歷荷爾蒙暴升暴跌、角色上嘅轉變、日夜照顧BB,放產假嘅時候操勞,返工之後又可能要面對唔同壓力,加上同屋企人為BB經常出現嘅鎖碎問題,好容易令媽媽嘅情緒有唔同程度嘅狀況。我明,我真係明!


如果各位媽媽喺產後覺得任何唔開心,唔好怕覺得自己情緒出現問題,多啲同屋企人同朋友分享感受,真係頂唔順就算幾唔願意都有需要搵幫手,唔好由得自己一個獨自面對呀!
故事想帶出嘅思考就係阿媽都只係一個人,而唔係一個超人嘅角度去睇做咗媽媽之後受到嘅唔同壓力,描寫得細緻精彩,好適合夫妻同準備結婚嘅情侶入場。 最後講講個香港譯名,「論盡」語帶雙關,究竟係要「論盡」做人老母甚艱難?定為做人老母可以有幾「論盡」呢?就留返大家入場睇喇!

是次小分享完畢有興趣可按 麵語錄食玩遊記 by Aminn 或 C家重地 其他分享 🙂

Aminn | Beauty.Food.Fun.Travel.Trendy|