小JM料理台。BB版番茄洋蔥炆牛肋骨

有時要分開煮大人同小朋友飯餸其實媽媽都幾攰,

幸好小JM從小就好喜歡食蕃茄及洋蔥,而且對蔬果類都特別易接受,
所以今次就決定要煮一個大人同小朋友都啱食嘅餸,
而且最好係可以百搭一啲,
配飯又得,配意粉又得,配烏冬都一樣得!
咁樣選擇就會變得多咗添!
無錯,今次我決定煮【BB版蕃茄洋蔥炆牛肋條】!
材料:

牛肋條 一條
蕃茄 兩至三個
洋蔥 兩個
紅蘿蔔 一至兩條
(可因人數而加減份量喔!)
做法:
1.) 牛肋條需要預先解凍及洗淨

2.) 煮滾一鍋水,加入迷迭香葉及牛肋條汆水,再撈出瀝乾,備用
3.) 將蕃茄、洋蔥及紅蘿蔔洗淨,並切成小塊

4.) 將嘅蕃茄、洋蔥及紅蘿蔔放入已預熱嘅鍋中稍為炒香
     *可預先留起1/3嘅蕃茄及洋蔥後下*

5.) 再將牛肋條放回鍋中一齊炆
6.) 可加入少量水、冰糖及豉油稍作調味
7.) 待大滾之後就可以轉為細火慢煮約45分鐘即可

8.) 將先前預留嘅蕃茄及洋蔥放入,再煮15分鐘即成。

小分享:
* 如果只係大人食的話,可以加入茄膏令味道更濃
* 可按個人喜好隨意加入薯仔一同煮喔
* 為免造成黏底,記得間中攪拌一下喔
* 選擇烏冬的話可以選鈉含量較低嘅品牌